Возачите кои патуваат низ Германија треба особено да внимаваат на сообраќајната сигнализација, бидејќи игнорирањето на одредени знаци може да резултира со високи парични казни.
На автопатот А1, во правец кон Хамбург, полицијата за само 13 минути регистрирала дури 51 прекршок, откако возачи продолжиле да ја користат десната сообраќајна лента и покрај поставениот знак со црвен знак „X“.
Лентата била затворена поради сообраќајни околности, но дел од возачите не реагирале навреме на сигнализацијата.
Против сите 51 возач биле покренати постапки за сообраќајни прекршоци, а вкупниот износ на предвидените казни достигнал 9.180 евра.
Сепак, германската полиција предупредува дека сумата може да биде и значително повисока. Доколку се утврди дека возачот намерно го игнорирал знакот или со своето однесување ги загрозил останатите учесници во сообраќајот, казната може да биде зголемена.
Во Германија, игнорирањето на црвениот знак „X“, кој означува дека сообраќајната лента не смее да се користи, се санкционира со парична казна од 90 евра и еден казнен поен.
Казните може да бидат дополнително зголемени доколку со прекршокот се загрозени други учесници во сообраќајот или е предизвикана материјална штета.
Затоа, возачите од Македонија и регионот кои патуваат кон Германија треба да знаат дека црвениот знак „X“ над сообраќајната лента мора да се сфати сериозно. Неговото игнорирање во Германија се третира како особено сериозен сообраќаен прекршок и во одредени ситуации може да биде споредуван со непочитување на црвено светло на семафор.
…
