Легендарното „Југо“ би можело повторно да се појави на европскиот автомобилски пазар, речиси 20 години по прекинот на неговото производство. Нови детали за проектот беа откриени на автомобилската конференција „SEE Automotive“ во Белград.
Новиот модел е замислен како достапен автомобил со хибриден погон, а според најавите цената би можела да биде околу 12.000 евра. Со тоа, возилото би се позиционирало меѓу најдостапните нови автомобили на европскиот пазар.
Предвидено е „Југо“ да користи хибридна технологија со продолжен домет. Бензинскиот мотор нема директно да ги придвижува тркалата, туку ќе служи како генератор за производство на електрична енергија. На тој начин автомобилот би можел да функционира без потреба од приклучување на надворешна електрична мрежа.
Според досегашните најави, во идеални услови потрошувачката би можела да се движи околу 2,2 литри гориво на 100 километри.
Дизајнот на новото „Југо“ останува во линија со концептот кој беше претставен во Минхен минатата година. Автор на дизајнот е Дарко Марчета од Зрењанин.
Планот е новиот прототип за првпат јавно да биде претставен на Експо 2027 во Белград. Сè уште нема конечна информација каде би се произведувал автомобилот. Некогашната фабрика „Застава“ во Крагуевац, каде што се произведуваше оригиналното „Југо“, денес е во сопственост на „Стелантис“.
Доколку проектот биде реализиран според најавите, новото „Југо“ би можело да биде обид легендарното име повторно да се врати на патиштата, но овојпат со современа хибридна технологија.
…
