Со доаѓањето на есента и пократките денови, многумина забележуваат дека домот повеќе не изгледа толку топло и пријатно како во текот на летото. Причината, сепак, можеби не е во мебелот, бојата на ѕидовите или декорацијата, туку во осветлувањето.
Експертите за уредување на ентериерот посочуваат дека неправилно избраната светлина може целосно да ја промени атмосферата во просторијата. Особено ладното, бело светло може да создаде стерилен и непријатен впечаток.
Затоа сè поголемо внимание се посветува на таканареченото слоевито осветлување – наместо една силна сијалица на средината од таванот, во просторијата се комбинираат повеќе извори на светлина, како подни и столни ламби.
При изборот на сијалици, важна е температурата на бојата, која се мери во келвини. За дневна соба и простории во кои се одмора, се препорачува потопла светлина од околу 2.200 до 2.700 келвини.
За кујните, пак, посоодветна може да биде нешто понеутрална светлина од околу 3.000 келвини, особено над работните површини каде е потребна подобра видливост.
Важен е и бројот на лумени, кој ја покажува јачината на светлината, како и CRI индексот – показател за тоа колку природно се прикажуваат боите под одредено осветлување. Сијалиците со CRI над 90 генерално овозможуваат поприродно прикажување на боите во просторот.
Со неколку едноставни промени, како замена на сијалиците и додавање столни или подни ламби, просторот може да добие сосема поинаква атмосфера без големи инвестиции.
Особено во есенските месеци, кога природната светлина е сè пократка, правилно избраното топло осветлување може да биде еден од наједноставните начини домот да изгледа поудобно и попријатно.
…
