Пентагон разгледува план за значително намалување на американското воено присуство во Европа, при што од континентот би можеле да бидат повлечени околу 25.000 војници, објави NBC News, повикувајќи се на седум актуелни и поранешни американски и западни официјални лица.
Според информациите, постои можност бројот на повлечени војници да достигне и до 40.000. Во Европа во моментов се распоредени околу 80.000 американски војници.
Планот, освен војници, би опфатил и авиони, воени бродови, оружје и друга воена опрема. Доколку биде реализиран во најавениот обем, би претставувал едно од најзначајните намалувања на американското воено присуство во Европа од крајот на Студената војна.
Најголеми последици би почувствувале Германија, Италија и Шпанија, каде што се распоредени значителен број американски сили и се наоѓаат голем дел од американските воени бази на континентот.
Разгледувањето на планот доаѓа во период кога сојузниците од НАТО предупредуваат на безбедносните ризици во Европа и на потребата од одржување на силно американско присуство.
Американскиот претседател Доналд Трамп во повеќе наврати порача дека европските земји треба да преземат поголема одговорност за сопствената одбрана. Во Вашингтон, истовремено, се разгледува пренасочување на дел од американските воени ресурси кон други приоритети, вклучително и Кина и Иран.
Засега нема конечна одлука за повлекувањето, а деталите за евентуалното преструктурирање на американските сили во Европа допрва треба да бидат утврдени.
