Седумнаесетгодишна девојка загина, три лица се здобија со тешки телесни повреди, а уште едно лице е повредено во сообраќајна несреќа што се случила на патот Битола – Прилеп.
Според информациите од Министерството за внатрешни работи, несреќата била пријавена во СВР Битола на 19 септември 2026 година, во 18:29 часот. Судирот се случил кај местото познато како „Туланата“.
Во несреќата учествувале патничко возило „опел“ со битолски регистарски ознаки, управувано од Е.Ф. (28) од прилепското село Канатларци, и патничко возило „форд“, исто така со битолски регистарски ознаки, управувано од М.Н. (48) од селото Долно Српци, Општина Могила.
На местото на несреќата починала 17-годишна сопатничка од „опелот“. Смртта ја констатирал лекар од Итната медицинска помош во Битола.
Возачот на „опелот“, Е.Ф., се здобил со тешки телесни повреди.
Тешко биле повредени и Д.Н. (44) и седумгодишно дете од Долно Српци, кои биле сопатници во „фордот“. Повредите биле констатирани во Клиничката болница во Битола.
Со повреди се здобил и возачот на „фордот“, М.Н.
Увид на местото извршила екипа на СВР Битола. Полицијата работи на утврдување на причините и околностите под кои се случила несреќата.
