Рускиот претседател Владимир Путин изјави дека Москва нема агресивни намери кон европските држави и дека е подготвена за обновување на односите и соработката со своите соседи. Истовремено, тој предупреди дека Русија ќе одговори доколку процени дека нејзината безбедност е загрозена.
Путин ги упати пораките во петокот, за време на состанокот на руската Воено-индустриска комисија, на кој беа претставени и приоритетите на новата државна програма за вооружување.
„Сакам уште еднаш да нагласам дека Русија нема агресивни намери кон Европа или кон европските земји. За тоа едноставно нема никаква основа. Подготвени сме за соработка и за обновување на односите со нашите европски соседи“, рече Путин.
Тој обвини дел од европските лидери дека се подготвуваат за можен воен конфликт со Русија и дека војната во Украина, како и тврдењата за руска закана, ги користат за оправдување на своите внатрешни и безбедносни политики.
Ги критикуваше воените вежби во Балтичкото Море
Рускиот претседател посебно се осврна на воените вежби што европските земји ги спроведуваат во Балтичкото Море.
Путин тврди дека во рамките на овие активности се разработуваат и сценарија за запленување цивилни пловила. Тој ги обвини европските држави за двојни стандарди, бидејќи, според него, јавно повикуваат на почитување на меѓународното право, а истовремено се подготвуваат за дејства спротивни на тие принципи.
„Постојано зборуваат за одбрана на меѓународното право и почитување на неговите норми, а сепак се подготвуваат за запленување цивилни пловила“, изјави Путин.
Потоа упати директно предупредување дека Москва нема да остане без одговор доколку ваквите активности продолжат.
„Оставете нè да живееме во мир. Во спротивно, и ние ќе бидеме принудени да реагираме“, порача рускиот претседател.
Нуклеарната тријада останува апсолутен приоритет
На состанокот Путин ги претстави и главните насоки на новата руска државна програма за вооружување.
Според него, програмата ќе биде насочена кон модернизација на вооружените сили и развој на руската одбранбена индустрија, во согласност со промените во глобалните безбедносни закани.
Како апсолутен приоритет го посочи натамошното зајакнување на руската нуклеарна тријада, составена од копнени интерконтинентални ракети, стратешки подморници и бомбардери способни да носат нуклеарно оружје.
Путин оцени дека нуклеарната тријада е клучна за гарантирање на суверенитетот на Русија и за одржување на глобалната рамнотежа на силите.
Тој изјави дека 92 проценти од руските Стратешки ракетни сили веќе се опремени со современо оружје.
Зајакнувањето на нуклеарните сили и унапредувањето на противракетната одбрана биле меѓу главните теми на состанокот на Воено-индустриската комисија, пренесе и “Ројтерс” (https://www.reuters.com/world/putin-says-ukraine-interfering-russian-parliamentary-election-2026-09-18/).
Повеќе дронови, роботски системи и прецизно оружје
Меѓу другите клучни приоритети Путин ги наведе зајакнувањето на противвоздушната и противракетната одбрана, пошироката употреба на беспилотни летала и роботски борбени системи, како и развојот на оружје со висока прецизност.
Русија, според најавите, ќе продолжи да инвестира и во развојот на воената вселенска инфраструктура.
Една од целите е комплетирање на руската орбитална сателитска констелација, која треба да ги подобри можностите за вселенско извидување, навигација и комуникација.
Сателитската мрежа треба да обезбеди и поширок пристап до брз интернет, како и командување и контрола над воените сили и вооружувањето во реално време.
Пораките на Путин доаѓаат во време на високи тензии меѓу Русија и европските држави поради војната во Украина, зголеменото европско вооружување и сè почестите меѓусебни обвинувања за безбедносни закани.
