Собраниската Комисија за прашања на изборите и именувањата ја усвои предлог-одлуката со која се предвидува намалување на коефициентите за пресметка на платите на избрани и именувани функционери.
Предлогот следува по одлуката на Уставниот суд со која беше укината фиксната основица за пресметување на функционерските плати. Со тоа се создаде можност платите автоматски да се зголемуваат при раст на просечната плата во државата.
Со новите коефициенти се предлага да се воспостави постабилен модел за пресметување на платите и да се ограничи можноста за дополнително зголемување на буџетските расходи.
Мерката ги опфаќа претседателот на државата, претседателот на Собранието, премиерот, пратениците, како и раководствата на независните регулаторни тела и државните комисии.
Претседателот на Комисијата, Ѓорѓија Сајкоски, изјави дека предлогот е подготвен во согласност со одлуката на Уставниот суд, со цел да се избегне правен вакуум во начинот на пресметување на платите.
По усвојувањето на Комисијата, предлог-одлуката треба да биде разгледана на пленарна седница, каде што пратениците ќе се изјаснат за нејзиното конечно усвојување.
…
