Мала европска држава со нешто повеќе од 90.000 жители се соочува со сериозен недостиг од работна сила, поради што сè повеќе ги отвора можностите за вработување странски работници.
Станува збор за Андора, кнежевство сместено на Пиринеите, меѓу Франција и Шпанија. И покрај релативно малото население, земјата бележи економски раст и има еден од повисоките животни стандарди во Европа.
Според официјалните податоци, просечната месечна плата во Андора достигнала 2.760,46 евра, што е раст од 7,7 отсто на годишно ниво. Медијанната плата, пак, изнесува 2.235,73 евра.
Највисоки примања имаат вработените во финансискиот сектор, каде што просечната месечна заработка е 4.972,10 евра.
Во секторот за енергетика и комунални услуги просечната плата изнесува 3.607,83 евра, додека во малопродажбата достигнува 2.405,99 евра.
Во хотелиерството и угостителството просечната заработка е 2.151,69 евра, а во земјоделството околу 2.000 евра.
Кои работници најмногу се бараат?
Недостигот од домашна работна сила ги принудува властите да ги зголемат квотите за вработување странци.
Меѓу најбараните кадри се здравствените работници, наставниците и другите работници во образованието, негувателите на стари и болни лица, домашните помошници и возачите на автобуси.
Голема побарувачка има и во туризмот, кој е еден од клучните сектори на економијата. Покрај сезонските дозволи за работа во хотелиерството и угостителството, Андора воведе и пилот-програма со дополнителни 450 работни дозволи за странци за периодот од декември до август.
Работна недела од 40 часа и до 30 дена одмор
Покрај платите, Андора привлекува работници и со релативно поволни услови за вработување.
Работната недела трае 40 часа, а вработените имаат право на 30 дена платен годишен одмор. Дел од приходите се издвојуваат за социјално осигурување, кое опфаќа здравствена и пензиска заштита, како и други права.
Даночниот систем во земјата е релативно поволен. За годишни нето-приходи до 24.000 евра не се плаќа данок на доход, додека највисоката стапка за повисоките примања изнесува 10 отсто.
Андора не е членка на Европската Унија, па за вработување на странски државјани е потребна соодветна работна дозвола. Сепак, земјата има воспоставено процедури преку кои се регулира ангажирањето на странска работна сила.
Недостигот од работници, особено во туризмот, здравството, образованието и одредени услужни дејности, ја прави странската работна сила сè поважен дел од пазарот на трудот во оваа мала европска држава.
…
