САД ја отфрлиле понудата на Иран за повторно отворање на Ормускиот теснец, за време на индиректните разговори меѓу двете страни на маргините на Генералното собрание на ОН во Њујорк.
Според извештаите, на иранската страна ѝ било порачаано дека Техеран не го контролира Ормускиот теснец, а американската страна го довела во прашање и правото на Иран да поставува услови за негово повторно отворање.
Иран, наводно, на САД им поставил рок од една недела за исполнување на своите услови. Меѓу барањата биле итно укинување на американската поморска блокада, ослободување на замрзнатите ирански средства и завршување на воените дејствија на сите фронтови.
Американските специјални пратеници Стив Виткоф и Џаред Кушнер ги отфрлиле овие барања.
Разговорите се одвивале индиректно, со посредство на Катар. Виткоф и Кушнер биле во една просторија, додека иранскиот министер за надворешни работи Абас Арагчи бил во друга, а катарските посредници ги пренесувале пораките меѓу двете страни.
Можно е да има и дополнителни разговори пред завршувањето на заседанието на Генералното собрание на ОН. Сепак, посредниците ја очекуваат одлуката на американскиот претседател Доналд Трамп дали дипломатскиот процес ќе продолжи или Вашингтон ќе избере друг пристап.
Овие разговори се прва рунда директни дипломатски контакти меѓу двете страни од средината на јуни.
Трамп претходно изјави дека американските специјални пратеници разговарале со ирански претставници и оцени дека состанокот поминал „многу добро“ и траел околу три часа.
„Не можам да замислам зошто Иранците не би сакале да постигнат договор. Станува збор или за потенцијална големина или за уништување, тоа се нивните две опции“, изјави Трамп, додавајќи дека Иран „може да биде голема земја“.
Американскиот претседател истакна и дека неговите специјални пратеници договориле нова средба со Иран во блиска иднина.
Во говорот пред Генералното собрание на ОН, Трамп порача дека САД никогаш нема да дозволат Иран да дојде до нуклеарно оружје.
Ормускиот теснец е еден од најважните светски поморски коридори за транспорт на нафта и гас, поради што неговото затворање или ограничување на пловидбата има значително влијание врз енергетските пазари и глобалната трговија.
…
