Последиците од климатските промени сè посилно се чувствуваат во Европа, а особено се погодени земјоделството, инфраструктурата и животната средина, оцени европратеникот и постојан известувач на Европскиот парламент за Македонија, Томас Вајц.
Говорејќи на Втората сесија на Мешовитиот парламентарен комитет ЕУ – Северна Македонија, посветена на животната средина, Вајц посочи дека годинава Европската Унија се соочила со топлотни бранови, суши и големи шумски пожари.
Според него, дел од овие појави веќе не се ограничени на традиционално погодените региони, туку се забележуваат и во земји каде што претходно биле невообичаени.
Вајц оцени дека борбата против климатските промени мора да продолжи, но паралелно со намалувањето на емисиите потребно е општествата да се приспособат на условите кои веќе се менуваат.
Тој посочи дека во ЕУ годинава биле регистрирани околу 35.000 смртни случаи поврзани со влијанието на високите температури.
Како пример ја посочи Австрија, каде што екстремните температури влијаеле и врз железничкиот сообраќај.
„Ситуацијата ескалира и политичарите треба да бидат свесни дека треба да ги подготвиме општествата, градовите, земјоделството и сообраќајот“, рече Вајц.
Во однос на Македонија, европратеникот се осврна и на низа прашања поврзани со животната средина, меѓу кои управувањето со отпадните води, депониите, загадувањето на воздухот и рударството.
Тој посебно го истакна потенцијалот за развој на природниот туризам, посочувајќи дека Македонија располага со голем број природни богатства.
Вајц ги спомена Пелистер, Галичица, Маврово и Шар Планина, како и трите национални паркови во земјата.
„Северна Македонија е една од најубавите земји што ги имам посетено. Колку луѓе знаат за тоа? Рекламирајте се, покажете му на светот какви убавини имате“, порача Вајц.
Според него, развојот на природниот туризам не е само прашање на заштита на животната средина, туку и можност за економски развој, особено за локалните заедници.
Тој како примери за развој на природниот туризам ги посочи Албанија и Црна Гора, нагласувајќи дека Македонија има предуслови за сличен развој.
…
