Транспортот на нафта низ Ормускиот Теснец повторно бележи значително зголемување, откако со недели сообраќајот беше сериозно ограничен поради воените дејствија и заканите поврзани со конфликтот меѓу Иран, САД и Израел.
Според податоците на аналитичката компанија Vortexa, низ теснецот во просек минувале околу 11,2 милиони барели нафта дневно во текот на една недела. Во бројката се вклучени различни нафтени производи, како и течен нафтен гас (LPG) и деривати, меѓу кои и бензинот.
Vortexa проценува дека во однос на периодот пред почетокот на конфликтот, околу 80 отсто од транспортот на сирова нафта и гасни кондензати повторно се одвива преку Ормускиот Теснец.
Зголемување на извозот од Персискиот Залив регистрирала и аналитичарката Амена Бакр од Kpler. Според податоците на компанијата, главните производители на нафта од Блискиот Исток во септември извезувале околу 12,8 милиони барели дневно, што е значително повеќе во споредба со периодот кога транспортот бил најмногу погоден.
Сообраќајот низ Ормускиот Теснец беше во голема мера запрен поради воените активности и заканите од Иран, откако САД и Израел започнаа напади врз Иран кон крајот на февруари.
Како една од причините за зголемувањето на транспортот, Vortexa го наведува и проширувањето на таканаречената „шатл флота“. Станува збор за танкери кои, според аналитичарите и американските медиуми, под заштита на американската морнарица минуваат низ теснецот и ја преземаат нафтата од терминалите во Персискиот Залив, по што ја префрлаат на други танкери кои чекаат надвор од теснецот.
Ормускиот Теснец е еден од клучните светски поморски коридори за транспорт на енергенси, па секое нарушување на сообраќајот низ него има директно влијание врз глобалниот пазар на нафта и цените на енергенсите.
…
