Македонската православна црква и верниците денеска го празнуваат споменот на светите маченички Вера, Надеж и Љубов и нивната мајка Софија, светици кои со векови се почитуваат во христијанската традиција.
Празникот е посветен на четирите римски маченички кои живееле кон крајот на првиот и почетокот на вториот век, во времето на царот Адријан.
Софија, чие име на грчки значи мудрост, останала вдовица по раѓањето на својата трета ќерка. Таа ги воспитувала Вера, Надеж и Љубов во духот на христијанската вера, а нивните имиња ги симболизирале трите важни христијански добродетели.
Според житието, Вера имала 12 години, Надеж 10, а Љубов само 9 години кога семејството било изведено пред царот Адријан. Тие не се откажале од својата вера и одбиле да принесат жртви на паганските богови, и покрај заканите и ветувањата за богатство и удобен живот.
Царот најпрво ја повикал Вера, а потоа и нејзините сестри Надеж и Љубов. Трите девојчиња биле подложени на мачења и на крајот погубени поради својата вера.
Софија ги погребала своите три ќерки, а потоа три дена и три ноќи се молела над нивниот гроб. Според преданието, по тој период и таа починала, а Црквата ја почитува како маченичка поради нејзината вера и страдањето со своите ќерки.
Празникот ја нагласува духовната симболика на имињата Вера, Надеж и Љубов, како три добродетели што се поврзуваат со христијанското учење.
Именден денеска празнуваат: Софија, Софка, Вера, Верица, Нада, Надежда, Натка, Љубе, Љупчо, Љубен, Љубомир, Љубосав, Људмил и Љуба.
…
