Американскиот ресторански синџир TGI Fridays најави проширување на Балканот преку договор за развој со Devolli Group, со кој се предвидува отворање на првите ресторани на брендот во регионот.
Според објавените информации, Devolli Group планира да отвори вкупно 10 ресторани на TGI Fridays во Косово, Албанија и Македонија. Компанијата ги обезбедила и ексклузивните права за понатамошен развој и доделување подфраншизи на брендот на овие пазари.
Засега не е соопштено колку од планираните 10 ресторани ќе бидат отворени во Македонија, ниту во кои градови и кога би започнале со работа.
„Балканот претставува една од најинтересните можности за раст во Европа, комбинирајќи претприемачка енергија, развиен угостителски сектор и култура во која заедничкото собирање околу масата има големо значење“, изјави глобалниот претседател на TGI Fridays, Фил Брод.
Тој оцени дека Devolli Group е партнерот со кој американскиот бренд сака да го започне своето присуство во регионот, посочувајќи го нивното познавање на пазарот, оперативното искуство и долгорочната визија.
Најавата веќе привлече внимание на социјалните мрежи, каде корисниците го коментираат потенцијалното доаѓање на познатиот американски бренд и неговото присуство покрај другите меѓународни синџири за храна во регионот.
TGI Fridays е познат по концептот на американски casual dining, со понуда во која се застапени бургери, ребра, пилешко, различни предјадења и коктели.
Со договорот со Devolli Group, Македонија, Косово и Албанија се вклучуваат во планот за организирано проширување на брендот на балканскиот пазар.
…
