Полициска акција за сузбивање на трговијата со дрога денеска се спроведува во повеќе градови низ државата, соопшти Министерството за внатрешни работи. Акцијата е во тек, а надлежните најавуваат дека резултатите ќе ги објават по нејзиното завршување.
Операцијата ја спроведуваат полициски службеници од Одделот за организиран и сериозен криминал при МВР, под раководство на јавен обвинител од Основното јавно обвинителство за гонење на организиран криминал и корупција.
Според информацијата од МВР, активностите се насочени кон сузбивање кривични дела поврзани со неовластено производство и пуштање во промет на наркотични дроги, психотропни супстанции и прекурсори.
Засега Министерството не соопштува во кои градови се преземаат мерките, ниту дали има приведени лица или запленети супстанции. Не се објавени ни податоци за бројот на локации опфатени со акцијата.
Од МВР најавуваат подетални информации за преземените активности и резултатите по целосното завршување на операцијата.
