Голем пожар избувна во историскиот дворец „Милер“ на Исакиевскиот плоштад во центарот на Санкт Петербург, непосредно спроти познатата Исакиевска катедрала.
Според руското Министерство за вонредни ситуации, пријавата за пожарот била примена во 20:11 часот по локално време. Огнот брзо се проширил низ објектот, а зафатената површина достигнала околу 2.000 квадратни метри.
Поради брзото ширење на пожарот, степенот на сложеност бил подигнат на трет ранг. Првично било пријавено дека гори површина од околу 450 квадратни метри.
На терен биле ангажирани 125 пожарникари и 25 единици специјална техника. Екипите истовремено ги ладат покривите на околните објекти за да спречат натамошно ширење на огнот.
Засега нема информации за загинати или повредени лица. Според локалните информации, објектот бил неексплоатиран и бил подготвуван за реставрација.
Причината за пожарот засега не е позната. Од прокуратурата на Адмиралтејскиот реон соопштиле дека се утврдуваат сите околности и причините за избувнувањето на пожарот, што ќе бидат познати по целосното гаснење на огнот.
Историскиот објект, познат како дворецот „Милер“, потекнува од втората половина на XVIII век. Бил преуредуван во периодот од 1879 до 1880 година, а во 2021 година бил внесен во Единствениот државен регистар на објекти на културното наследство како објект од регионално значење.
…
