Украинскиот претседател Володимир Зеленски предупреди дека Русија би можела дополнително да ги засили нападите врз Украина со приближувањето на ноемвриските избори за Конгресот на САД.
Во интервју за шпанскиот весник „Ел Паис“, Зеленски оцени дека Москва во последните недели ги интензивирала нападите врз Киев и дека, според неговата проценка, целта е да се создаде хаос и да се изврши притисок врз населението да го напушти главниот град.
„Тактиката на Путин е да го ескалира конфликтот што е можно повеќе, и тој ќе го стори тоа. Како што се приближуваат изборите за Конгресот на САД, тој ќе го прави тоа сè почесто“, изјави Зеленски.
Тој тврди дека во Киев секојдневно се регистрираат меѓу 300 и 500 напади, при што се гаѓаат и објекти кои не се воени и се наоѓаат далеку од линијата на фронтот.
Според Зеленски, целта на нападите е да се наруши нормалното функционирање на градот, односно луѓето да не можат да одат на работа, а децата да посетуваат училиште и градинка.
Украинскиот претседател ги спореди актуелните случувања со почетокот на руската инвазија во 2022 година, кога Киев беше една од главните цели на руската офанзива.
Во меѓувреме, Зеленски соопшти дека украинските сили продолжуваат со напади со долг дострел врз руски цели. Тој наведе дека во последните 24 часа биле погодени нафтени постројки во руските региони Самара и Волгоград, како и други објекти во повеќе руски региони.
Тој истакна дека украинските сили спровеле операции и во Црното Море, како и во регионите Воронеж, Нижни Новгород, Краснодар и други области.
Русија и Украина продолжуваат со меѓусебни воздушни и напади со долг дострел, додека борбите продолжуваат и на фронтот.
…
