По повеќе од шест децении поминати во Музејот на византиската култура во Солун, посмртните останки кои му се припишуваат на средновековниот владетел цар Самоил се подготвуваат за транспорт во Бугарија.
Порталот „4NEWS.mk“ објави снимка на која, како што наведува, се гледаат состојбата и подготовката на коскените остатоци непосредно пред нивното официјално примопредавање на бугарските власти.
Станува збор за останки кои во 1965 година биле откриени на островот Свети Ахил во Преспа од страна на грчкиот археолог Николаос Муцопулос.
Оттогаш, тие се чуваат во Солун под музејски протоколи, а нивното потекло и идентификација со децении се предмет на научни и политички дискусии.
Во меѓувреме, во Софија се подготвува пречек со државни почести, вклучително и воено присуство и церемонија на плоштадот „Кнез Александар I“.
Сепак, околу автентичноста на останките и натаму постојат научни дилеми. Еден од аргументите што се посочуваат е дека врз коските не е направена современа ДНК-анализа која би можела со највисока можна сигурност да ја потврди нивната идентификација.
Токму затоа, снимката повторно го отвора прашањето за тоа што точно се чува во музејот во Солун и колку научно е потврдена поврзаноста на останките со цар Самоил.
…
