Чешкиот производител на автомобили „Шкода“ повлекува околу 1,7 милиони возила ширум светот поради можен дефект на управувачкиот систем, кој во одредени околности би можел да доведе до откажување на воланот.
Повлекувањето ги опфаќа моделите „Кодијак“, „Карок“, „Октавија“ и „Суперб“, соопштува ДПА.
Според базата на податоци за повлекување возила на германската Сојузна управа за моторен транспорт (КБА), проблемот може да биде предизвикан од завртка која би можела да се скрши и да доведе до дефект на управувачкиот механизам.
Како корективна мерка, спорната завртка треба да биде заменета со нова, отпорна на корозија.
Повлекувањето на „Шкода“ доаѓа само неколку дена откако матичната компанија „Фолксваген“, како и брендовите „Ауди“ и „Сеат“, повлекоа неколку милиони возила поради истиот потенцијален проблем.
Од „Фолксваген“ соопштија дека дефектот бил откриен во рамки на интерни проверки на квалитетот, при што бил идентификуван можен проблем со управувачкиот систем кај одредени возила од различни серии на модели.
Портпарол на компанијата потврдил дека проблемот бил откриен за време на проверките, но не соопштил дополнителни детали.
