Мини електричните автомобили, кои веќе стануваат дел од секојдневието во повеќе европски градови, почнуваат да се појавуваат и на македонскиот пазар.
Станува збор за компактни возила со две седишта, наменети првенствено за градско возење. Се полнат на струја, имаат ограничена брзина и значително пониски трошоци за движење во споредба со класичните автомобили.
Еден ваков модел наскоро ќе се најде во понудата на Стокомак, по цена од 3.999 евра. Од компанијата велат дека возилото може да се управува од 16 години со АМ категорија, а се регистрира еднаш, по што се плаќа годишно осигурување.
Особено внимание привлекува потрошувачката. Според податоците од компанијата, просечниот трошок за електрична енергија изнесува околу 25 до 30 денари на 100 километри.
„Цената на возилото е 3.999 евра. Возилото може да се управува со АМ категорија, со наполнети 16 години. Се регистрира само еднаш, исто како скутер, а потоа се плаќа само годишно осигурување“, велат од Стокомак.
Според компанијата, во маркетот во Усје веќе има тест-возило кое заинтересираните купувачи можат да го погледнат и пробаат.
Ако се земе предвид трошок од 30 денари на 100 километри, за 10.000 километри би биле потребни околу 3.000 денари за електрична енергија. Сепак, реалната потрошувачка зависи од повеќе фактори, меѓу кои температурата, начинот на возење, товарот, условите на патот и цената на електричната енергија.
При купувањето, појаснуваат од Стокомак, се добива потребната документација за технички преглед и регистрација. Бидејќи станува збор за увозно возило, при регистрацијата може да биде потребна и дополнителна постапка, зависно од конкретниот модел и неговата документација.
Мини електричните возила се наменети за кратки градски релации – одење на работа, факултет, пазарење или движење низ градот. Наместо класичен автомобил со поголема потрошувачка, корисникот добива мала затворена кабина со покрив, врати и место за сопатник.
Оваа категорија постепено се појавува и кај други продавачи во Македонија. VI Motors од Виница, на пример, најавува нова пратка за ноември на електричен модел со две седишта, наменет за возачи од 16 години со АМ категорија, со цена од околу 4.200 евра.
На домашниот пазар може да се најде и AERA SQ4, кој се нуди за околу 8.000 евра. Според наведените спецификации, има две седишта, максимална брзина до 45 километри на час и досег од околу 80 до 90 километри.
Така, во Македонија постепено се создава нов сегмент на мали електрични четирицикли – поевтини за купување од голем дел од електричните автомобили и со минимални трошоци за секојдневно градско движење.
…
