Европската Унија изрази сериозна загриженост поради измените на Законот за Специјализираните совети на Косово со седиште во Хаг, кои беа усвоени од косовскиот парламент.
Од Брисел оценуваат дека дел од измените не се усогласени со меѓународните обврски што Косово ги презело кон Европската Унија.
Со новите законски одредби се ограничува надлежноста на Специјализираните совети, се намалуваат максималните затворски казни и се отвора можност за помилување.
„Апелираме Косово да ги почитува своите меѓународни обврски за гарантирање на судската независност на Специјализираните совети на Косово, како и својата посветеност да обезбеди одговорност и правда за жртвите и нивните семејства од сите заедници во Косово“, порача портпарол на ЕУ.
Брисел истакна дека ја поддржува работата на Специјализираните совети како независна судска институција и нагласи дека нивната независност мора целосно да биде почитувана.
Од ЕУ додаваат дека судот ја спроведува правдата врз основа на принципот на индивидуална кривична одговорност.
На измените реагираше и германската амбасада во Косово. Портпаролката Каталин Хајне порача дека независноста на Специјализираните совети мора да биде зачувана за тие да можат да ја исполнат својата мисија – да обезбедат одговорност и правда за жртвите од сите заедници.
Измените беа предложени од Демократската партија на Косово, а во парламентот добија поддршка и од партијата на премиерот Албин Курти. Поддршката дојде во период кога партијата на Курти обезбеди поддршка за изборот на Јустина Широка-Пула за нова претседателка на Косово.
…
