Турскиот претседател Реџеп Тајип Ердоган порача дека државата ќе ги преземе сите неопходни мерки за справување со кризата што ги зафати инвестициските фондови во Турција.
Ердоган оцени дека турските пазари на капитал ќе успеат да ја надминат актуелната нестабилност, но притоа, како што рече, пазарот мора да се „исчисти од алчните паразити“.
„Покренуваме неопходни административни и правни постапки за да обезбедиме исплата на заштедите на нашите граѓани што е можно поскоро, без притоа да се оптовари јавниот буџет“, изјави турскиот претседател.
Тој нагласи дека надлежните институции ќе ја понесат правната и политичката одговорност за случајот, додавајќи дека никој што ги загрозил правата на граѓаните нема да остане неказнет.
Кризата ескалираше минатиот месец, кога турските финансиски регулатори наредија ликвидација на повеќе од 130 инвестициски фондови управувани од седум компании за управување со имот. Одлуката уследи по предупредувањата дека компаниите повеќе не се во можност да ги исплаќаат средствата на инвеститорите.
Вредноста на фондовите опфатени со ликвидацијата во изминатите три години надминала 20 милијарди долари, а според надлежните институции, кризата погодила речиси половина милион инвеститори.
Во меѓувреме, продолжува истрагата за можни манипулации со пазарот на акции и инвестициски фондови. Турскиот министер за правда Акин Ѓурлек соопшти дека досега се уапсени 85 лица осомничени за вмешаност во случајот.
За следење на ликвидацијата е формиран Комитет за координација на фондовите, предводен од потпретседателот Џевдет Јилмаз. Државниот надзорен совет, пак, треба да ги испита околностите и евентуалните пропусти што довеле до кризата.
„Нема да замижиме пред ниту еден, па и најмал пропуст, ниту пред какво било кршење на законите и прописите“, порача Ердоган.
Случајот доби и политичка димензија откако Фатма Бетуљ Сајан Каја поднесе оставка од функцијата заменик-претседателка на владејачката Партија на правдата и развојот (АКП).
Оставката уследи по обвинувања дека таа и нејзиниот сопруг оствариле значителни профити преку тргување со акции непосредно пред избувнувањето на кризата.
Турското Министерство за правда потврди дека двајцата треба да дадат исказ како осомничени пред надлежната единица за истрага на финансиски криминал и перење пари при Канцеларијата на главниот јавен обвинител во Истанбул.
Ердоган порача дека финансискиот систем на Турција, и покрај актуелната криза, треба од оваа ситуација да излезе постабилен, а пазарите на капитал да бидат заштитени од злоупотреби на штета на малите инвеститори.
…
