ВЛЕН бара целосно расветлување на случајот со двајцата млади од Сарај кои пријавиле малтретирање од полициски службеници и одговорност доколку истрагата утврди пречекорување на овластувањата или прекршување на законот.
Од партијата изразуваат длабока загриженост за случајот и сочувство со младите и нивните семејства, нагласувајќи дека секој граѓанин заслужува соодветен третман, заштита и правда.
„Насилството не може да се оправда со униформа, а секое пречекорување на овластувањата и секое прекршување на законот мора да добие соодветен одговор“, порачуваат од ВЛЕН.
Оттаму наведуваат дека како албанска политичка партија во власта активно се интересирале за случајот и го следеле неговиот развој. Доколку се утврди дека полициските службеници ги пречекориле овластувањата, бараат тие да одговараат во согласност со законот.
ВЛЕН го поздравува тоа што случајот е предмет на истрага од надлежните механизми за внатрешна контрола и бара постапката да се води сериозно, непристрасно и транспарентно. Партијата го повикува и Обвинителството да ги преземе сите неопходни законски дејства врз основа на доказите и наодите од истрагата.
Во соопштението, ВЛЕН ја обвинува опозицијата дека се обидува на случајот да му даде националистички призвук и да го искористи за поттикнување меѓуетнички тензии. Според информациите на кои се повикува партијата, полициските службеници осомничени за вмешаност припаѓаат на три различни етнички заедници.
Од ВЛЕН нагласуваат дека одговорноста треба да се утврдува врз основа на фактите, доказите и конкретните постапки на секое лице, а не според етничката припадност.
„Правата на граѓаните, човечкото достоинство и спроведувањето на законот немаат етничка припадност“, велат од партијата, осудувајќи ја секоја форма на насилство, како и обидите случајот да се искористи за поттикнување омраза и поделби.
ВЛЕН порачува дека двајцата млади и нивните семејства заслужуваат вистината да биде утврдена и правдата да биде задоволена. Според партијата, случајот бара институционална одговорност и почитување на законот.
„Истрагата мора да оди до крај. Вистината мора да се расветли и, доколку се утврдат прекршувања, одговорните мора да понесат одговорност, без исклучоци и без разлики“, се наведува во соопштението.
…
