Два брода биле погодени од беспилотни летала во Црното Море, во близина на бугарскиот брег, а еден од нив потонал. Бугарија најави дека ќе го повика рускиот амбасадор на разговор, иако засега нема јасни докази кој го извршил нападот.
Според изјавата на Румен Радев, бродот „Челзи 3“, во украинска сопственост и под малтешко знаме, бил погоден од три дрона околу 1:30 часот по полноќ. Нападот се случил на приближно 18 наутички милји од бугарскиот брег.
Сите 15 членови на екипажот — седум Украинци и осум Азербејџанци — биле спасени. На петмина им била укажана медицинска помош, но немало сериозно повредени. Спасен бил и еден член на екипажот од другиот, потонат брод.
Радев го оцени инцидентот како неприфатлив напад во непосредна близина на бугарските територијални води и најави разговор со генералниот секретар на НАТО, Марк Руте.
Тој посочи дека одговорноста за нападот не е утврдена, но оцени дека неговиот исход ѝ оди во прилог на Русија. Во таа врска најави и повикување на рускиот амбасадор.
Според Радев, ова е втор ваков инцидент во рок од една недела, што дополнително ја зголемува загриженоста за безбедноста на пловидбата во Црното Море.
…
