Германија, Италија и Белгија предлагаат механизам со кој земјите членки би можеле да го запрат спроведувањето нови регулативи на Европската Унија доколку ги оценат како преголем товар за владите и компаниите.
Барањето е содржано во писмо од германскиот канцелар Фридрих Мерц, италијанската премиерка Џорџа Мелони и белгискиот премиер Барт де Вевер до претседателот на Европскиот совет, Антониу Кошта, објавува „Политико“, кој имал увид во документот.
Тројцата лидери сметаат дека на Унијата ѝ е потребна „сопирачка за итни случаи“ како дел од напорите за зајакнување на економската конкурентност. Предлагаат и побрзи постапки за планирање и издавање одобренија, како и можност за привремено суспендирање одредени регулаторни барања.
Посебен акцент ставаат на малите и средните претпријатија. Од Европската комисија бараат дополнителни пакети за поедноставување на правилата и намалување на административните обврски.
Во писмото предупредуваат дека непотребните регулаторни трошоци можат долгорочно да го намалат европскиот индустриски капацитет и да ги ослабат инвестициите.
Иницијативата доаѓа пред самитот на Европскиот совет во Брисел и се надоврзува на претходните барања за подобрување на конкурентноста. На состанокот, лидерите треба да разговараат и за долгорочниот буџет на ЕУ, цените на енергијата и поддршката за Украина.
…
