Словачка нема да учествува во финансирањето нов заем од 70 милијарди евра за Украина за 2027 година, изјави премиерот Роберт Фицо по самитот на Европската Унија во Брисел. Според него, истата позиција ја застапува и унгарскиот премиер Петер Маѓар.
Изјавата доаѓа откако украинскиот претседател Володимир Зеленски побара дополнителна европска поддршка, предупредувајќи дека трошоците за војната следната година ќе достигнат 155 милијарди евра.
Зеленски на состанокот на 16 октомври им порачал на европските лидери дека на Украина ѝ се потребни уште најмалку 70 милијарди евра за одбрана, оружје и зајакнување на отпорноста на земјата.
Фицо, сепак, нагласил дека Братислава е подготвена да продолжи со помош преку други форми на соработка. Како примери ги навел проектите во образованието, патната инфраструктура и енергетските поврзувања.
Словачкиот премиер оценил и дека би било „опасно“ разговорите за финансирањето на Украина да се поврзуваат со преговорите за долгорочниот буџет на ЕУ за периодот 2028–2034 година. Според него, земјите членки сè уште се далеку од договор за тој буџет.
Тој упатил критика и дека на самитот недоволно се разговарало за мировни иницијативи и за завршување на војната меѓу Русија и Украина, пренесува словачката агенција ТАСР.
Барањето за дополнителни средства засега не претставува конечно одобрен заем. Европската комисија треба да подготви предлози за покривање на финансискиот недостиг на Украина во 2027 година, а начинот на финансирање останува предмет на разговори.
Европската Унија претходно договори заем од 90 милијарди евра за најитните буџетски и одбранбени потреби на Украина во 2026 и 2027 година. Новото барање се однесува на дополнителните потреби за следната година.
Во меѓувреме, Зеленски и Маѓар на 16 октомври во Брисел ја одржаа првата официјална билатерална средба. Според Ројтерс, унгарскиот премиер изјавил дека се договориле да ги обноват односите меѓу двете земји и изразил солидарност со Украина поради руската агресија.
