Во земјава пристигнаа првите 30.000 дози вакцини против сезонски грип, а здравствените установи се подготвуваат за почеток на имунизацијата. Според најновата најава на министерот за здравство Сашо Клековски, вакцинацијата треба да започне во среда, 21 октомври, со приоритет за најризичните категории граѓани.
Пријавувањето е отворено преку порталот “вакцинација.мк” (https://vakcinacija.mk/). Со пополнување на формуларот, граѓаните се регистрираат во системот „Мој термин“, по што ќе добијат СМС-порака со точниот датум и час за вакцинација на избраниот пункт.
Првата испорака е дел од планираните количества за претстојната сезона. Дополнителни 26.000 дози се очекуваат до 15 ноември, а надлежните работат на обезбедување уште 24.000, со што вкупниот број би достигнал 80.000 вакцини.
Според претходните изјави на Клековски, пристигнувањето на првите 30.000 дози било важно за навреме да започне заштитата на најранливите граѓани, додека преостанатите количества ќе се обезбедуваат во следните фази.
Вакцините ќе се распределуваат преку центрите за јавно здравје, а при доделувањето термини ќе се земаат предвид здравствената состојба и припадноста кон ризична група.
Бесплатната вакцинација е наменета за:
– лица над 65 години;
– лица со хронични заболувања;
– бремени жени;
– здравствени работници;
– деца на возраст од шест месеци до пет години.
Опфатени се и лицата сместени во установи за социјална заштита на стари лица, како и вработените во овие установи. Според најавата, меѓу првите ќе бидат вакцинирани жителите на старечките домови, за да се намали ризикот од ширење грип во нив.
Паралелно со подготовките за сезонскиот грип, здравствените власти најавуваат и нова испорака на БСЖ вакцини за новороденчињата. Преку договор со УНИЦЕФ се обезбедуваат количества за една година од јапонски производител. Според претходната најава, пристигнувањето е прашање на денови, по што се очекува нивна распределба до родилиштата и диспанзерите.
Примената на претходните БСЖ вакцини беше привремено запрена како мерка на претпазливост, по одлуката во Хрватска за обустава на употребата на вакцина од истиот производител.
Хрватскиот завод за јавно здравство соопшти дека во текот на 2026 година биле пријавени четири сомневања за остеитис или остеомиелитис поврзани со БСЖ вакцинација кај мали деца. Поради неочекувано зголемената зачестеност на пријавите, побарана е вонредна контрола на вакцината и утврдување на можните причини.
Станува збор за пријавени сомневања за несакана реакција, поради кои е преземена претпазлива мерка додека траат проверките.
