Протести поради растечките животни трошоци, состојбата во образованието и незадоволството од властите се одржуваат во повеќе европски земји, а дел од собирите прераснале во насилни судири со полицијата. Според извештаите што ги пренесува „24сата“, немири биле забележани во Франција, Белгија, Италија и Албанија, додека младински организации подготвуваат нова меѓународна мобилизација за 20 ноември.
Во Франција, според наведениот извештај, по саботните протести биле уапсени повеќе од 1.200 лица, а најмалку 150 полицајци биле повредени. Додека голем број граѓани протестирале поради животните услови и состојбата на јавните услуги, насилни групи палеле автомобили, кршеле излози и ограбувале продавници.
Во Париз биле поставувани барикади, а кон полициските возила биле фрлани камења. Полицијата употребила солзавец. Во текстот се наведуваат и обид за упад во стоковната куќа „Галери Лафајет“, оштетени банки и ограбени луксузни продавници.
Немири биле пријавени и во други француски градови. Според медиумските наводи, во Лимож била запалена историската градска куќа, а во Лион туристичка канцеларија.
Во Белгија, на 17 октомври, неколку стотици луѓе, претежно млади, се собрале во Брисел. Дел од демонстрантите се судриле со полицијата, која одговорила со солзавец и водени топови.
Студентските протести биле насочени против растот на трошоците за студирање и реформите за кои учесниците стравуваат дека ќе го отежнат пристапот до високото образование. Собири се одржале и во Лиеж, каде што студентите ги истакнале проблемите во франкофонскиот образовен систем.
Во Милано, протестот против војните и поскапувањата започнал мирно, но подоцна прераснал во насилство. Според италијанските медиуми цитирани во извештајот, маскирани лица фрлале предмети кон полицијата, ограбувале продавници и палеле барикади.
Полицијата употребила солзавец и водени топови, а плоштадот „Пјаца дел Дуомо“ и трговската галерија биле евакуирани. Во извештаите се наведуваат најмалку двајца повредени полицајци и околу 50 приведени демонстранти, меѓу кои и малолетници.
Во Албанија, илјадници млади се собрале пред Министерството за образование во Тирана, во рамките на протестното движење што бара крај на владеењето на премиерот Еди Рама. Според полициските податоци пренесени во текстот, досега биле приведени 500 лица, од кои 330 биле пуштени на слобода. Пријавени биле околу 120 повредени полицајци и 45 демонстранти.
Паралелно со овие случувања, се подготвува меѓународната кампања „International Youth Strike“. Според „Јутарњи лист“, таа обединува триесетина младински и студентски организации од повеќе од десет земји на ЕУ, а за 20 ноември се најавуваат активности во 48 држави.
Под слоганот „Се бориме за нашата иднина, а не за нивните војни“, кампањата го истакнува незадоволството на младите од образованието, животните услови и недостигот од перспектива.
…
