Американскиот претседател Доналд Трамп упати нови остри критики кон украинскиот претседател Володимир Зеленски, обвинувајќи го дека не сака да ја заврши војната. Во објава на својата мрежа „Трут соушл“, Трамп ја образложи и одлуката да не потпише нов пакет санкции против Русија, објави „Индекс“.
Според Трамп, воведувањето дополнителни санкции во овој момент би можело да ја оддалечи Москва од преговарачката маса. Тој тврди дека разговорите напредуваат и дека документот може да го потпише подоцна, кога ќе оцени дека е потребно.
„Во процес сум на преговори за мир во војната меѓу Русија и Украина и не сакам да направам нешто што би ја оддалечило Русија од преговарачката маса“, порача американскиот претседател.
Трамп ги критикуваше украинските напади врз руските рафинерии, тврдејќи дека тие ги нарушуваат светските пазари на дизел и им предизвикуваат штета на американските земјоделци, сточари и компании. Истовремено, ги претстави руските испораки на дизел по ниски цени како придонес за светското снабдување.
Во објавата тој оцени и дека Русија му дава значително помала поддршка на Иран отколку што би можела, додавајќи дека сака таквата состојба да продолжи.
Најостриот дел од пораката беше насочен кон Зеленски. Трамп го обвини дека европската финансиска поддршка и претходната американска помош му овозможуваат да ја продолжува војната.
„Тој не сака да ја заврши оваа војна и веројатно никогаш не ни сакал“, напиша Трамп, изнесувајќи и оценка дека Украина можела да постигне подобар договор пред две години.
Американскиот претседател ја опиша Украина како земја во тешка состојба, со изгубена територија и големи човечки загуби. Притоа употреби и географски неточна формулација дека нејзините „океани и мориња исчезнале“. Украина нема излез на океан, туку на Црното и Азовското Море.
Според „Индекс“, објавата доаѓа по разговорите на Трамп со рускиот претседател Владимир Путин и одлуката за привремено олеснување на санкциите за рускиот дизел. Вашингтон ги поврзува овие потези со напорите за намалување на цените на горивата и постигнување договор за прекин на нападите врз енергетската инфраструктура.
Во меѓувреме, Зеленски во интервју за Ен-би-си предупреди дека евентуално американско застанување на страната на Русија би имало тешки последици за Украина.
„Ако Соединетите Американски Држави застанат на страната на Русија, секако дека нема да издржиме“, изјави тој, оценувајќи дека повлекувањето на американската поддршка би било историска грешка и голема трагедија.
Украинскиот претседател изнесе и обвинувања за ограничување на разузнавачката поддршка и забавување на мрежата „Старлинк“. Американскиот државен секретар Марко Рубио, според текстот, негирал дека Белата куќа намерно ја забавувала интернет-врската што ја користат украинските дронови.
…
