Педесет и осумгодишен возач загина, еден сопатник е повреден, а мотоциклист се здоби со тешки повреди во две одделни сообраќајни несреќи, пријавени ноќеска во струмичко и валандовско. Според МВР, кај двајца возачи биле измерени 1,32 и 1,45 промили алкохол во крвта.
Смртоносен судир на патот Струмица – Радовиш
Првата несреќа била пријавена на 25 октомври околу 2 часот, на магистралниот пат Струмица – Радовиш, во близина на селото Радичево, општина Василево.
Во судирот учествувале автомобил „пежо“ со радовишки регистарски ознаки, управуван од Н.В. (19) од селото Злеово, и „мицубиши“ со струмички ознаки, управувано од Р.С. (58) од селото Добрејци.
Од здобиените повреди, возачот на „мицубишито“ починал на местото. Смртта ја констатирал лекар од Итната медицинска помош. Повреден е и неговиот сопатник, Д.А. (36) од селото Дабиле.
Увид извршиле јавен обвинител и екипа на СВР Струмица. Според полицијата, кај 19-годишниот возач биле измерени 1,32 промили алкохол во крвта, по што бил лишен од слобода.
По наредба на јавниот обвинител, телото на починатиот е предадено на обдукција.
Тешко повреден мотоциклист во Марвинци
Втората несреќа била пријавена во 00:15 часот, на регионален пат во селото Марвинци, валандовско.
Се судриле автомобил „мерцедес“, управуван од В.И. (26) од селото Брајковци, и мотоцикл „кавасаки“, управуван од М.Г. (57) од Марвинци. Двете возила имале валандовски регистарски ознаки.
Мотоциклистот се здобил со тешки телесни повреди, констатирани во Општата болница во Гевгелија.
Увид извршила екипа на ОВР Валандово, а кај возачот на „мерцедесот“ биле измерени 1,45 промили алкохол во крвта, соопшти МВР.
Од Министерството најавуваат дека по целосното документирање на двата случаја ќе следуваат соодветни пријави.
