Студентската листа во Србија вечерва ги повика граѓаните мирно да го следат пребројувањето на гласовите и да им дадат поддршка на изборните контролори во своите градови и села. На белграѓани им порача да не се собираат во близина на места каде што, според нивните информации, има засилено присуство на полиција и неуниформирани лица.
Повикот бил упатен на вечерното обраќање од изборниот штаб во Белград, пренесува „Слободен печат“.
Претставниците на листата нагласиле дека затворањето на избирачките места не значи и крај на изборниот процес. Следуваат пребројувањето на гласовите, составувањето на записниците и предавањето на изборниот материјал на локалните изборни комисии.
Оттаму побарале граѓаните да останат во местата каде што гласале, да ја следат работата на изборните органи и да помогнат процесот да заврши без инциденти.
„По ваков ден и ваква излезност, не смееме да дозволиме некој во последните часови да го загрози она за што толку се боревме“, порачале од Студентската листа, повикувајќи на мирно и достоинствено однесување.
Посебно ја нагласиле потребата од поддршка низ целата земја, наместо концентрирање на граѓаните во главниот град.
„Вечерва цела Србија ни е потребна таму каде што денеска гласаше. Србија не е во Белград, Србија е во Србија“, било истакнато на обраќањето.
Според последните податоци со кои располагала листата во моментот на обраќањето, гласале повеќе од 4,35 милиони граѓани. Излезноста ја оцениле како историска, а сопствени податоци за изборните резултати најавиле во текот на вечерта.
Обраќањето го завршиле со пораката: „Безбедно, мирно и достоинствено до крај.“
