Аркин Јахији, кандидатот на Националната алијанса за интеграција (НАИ), предводена од ДУИ, победи на изборите за градоначалник на Општина Брвеница. По објавувањето на изборните резултати, неговите поддржувачи започнаа прослава, а на социјалните мрежи беа објавени видеоснимки од славјето.
Според податоците на Државната изборна комисија (ДИК), по обработката на сите 24 избирачки места, Јахији освоил 4.442 гласа, односно 50,36 отсто.
Неговиот противкандидат Стојанчо Радичевски, поддржан од коалицијата „Твоја Македонија“ предводена од ВМРО-ДПМНЕ, добил 4.177 гласа или 47,36 отсто. Разликата изнесува 265 гласа.
Ахмети и Таравари на прославата
ДУИ на својот официјален фејсбук-профил објави видеа од прославата во Брвеница.
Пред присутните симпатизери се обратија Јахији, лидерот на ДУИ Али Ахмети и Арбен Таравари од Алијанса за Албанците.
ВМРО-ДПМНЕ ја призна победата
Генералниот секретар на ВМРО-ДПМНЕ, Драган Ковачки, му ја честиташе победата на Јахији, но истовремено ги обвини политичките противници дека донеле гласачи кои не живеат во Брвеница.
Ковачки изјави дека „против бројките не се може“, признавајќи го изборниот исход.
Со освоени 50,36 отсто од гласовите, Аркин Јахији ја доби градоначалничката трка во Брвеница, една од најнеизвесните во вториот круг од локалните избори.
