На дел од системите за ладење достапни преку интернет наводно сè уште била активна фабричката лозинка „12345“. Експертите посочуваат дека слабите лозинки и незакрпените пропусти можеле да им го олеснат пристапот на напаѓачите, пренесува „Индекс“, повикувајќи се на „Еуроњуз некст“.
На почетокот на ноември биле погодени продавници во девет европски земји и неколку банки за крв во Франција. Во дел од продавниците температурата во ладилниците и замрзнувачите достигнала и до 50 степени Целзиусови, поради што морале да ја фрлат расипаната храна. Банките за крв не изгубиле залихи, а сторителите засега се непознати.
Обиди за пристап биле забележани уште во октомври
Компанијата за кибербезбедност „Луповис“ меѓу 20 и 30 октомври регистрирала повеќе од 276 обиди за пристап до контролери за ладење од производителот „Данфос“. Според компанијата, обидите потекнувале од 91 различен извор, а најголема активност имало на 26 октомври.
Обидите биле забележани на лажни системи што истражувачите намерно ги изложиле на интернет за да го следат однесувањето на напаѓачите. Тие се обидувале да се најават со фабрички лозинки и да искористат познати безбедносни пропусти. Овие обиди сами по себе не докажуваат дека истите лица стојат зад нападите врз продавниците.
Кој стои зад нападите?
Директорот на „Луповис“, Ксавие Белекенс, посочил дека дел од користените услуги за хостирање претходно биле користени од руски хакерски групи. Според него, тоа е можна трага, но компанијата нема докази што ги поврзуваат напаѓачите со Русија.
Џорџ Нот, уредник за технологија во списанието „Д Гросер“, предупредил дека е прерано да се заклучи кој стои зад нападите и што сакал да постигне. Никој не презел одговорност и не било побарано плаќање откуп.
Ризикот се однесува и на други уреди
Според Белекенс, системите би биле подобро заштитени ако пристапот до нив бил ограничен преку виртуелна приватна мрежа (VPN). Нот посочил дека за дел од искористените пропусти веќе постоеле безбедносни закрпи.
Слични контролери управуваат и со греење, вентилација, камери, врати и аларми. Во болница или центар за податоци, предупредуваат експертите, напад би можел да исклучи камера или аларм без персоналот веднаш да забележи. Засега нема индиции дека во нападите врз системите за ладење била користена вештачка интелигенција.
…
