Поранешниот вицепремиер Фатмир Битиќи за „Трилинг“ оцени дека поразот на СДСМ на парламентарните избори се должи на внатрешна неорганизираност, занемарување на идеолошката матрица и на тоа што партијата „станала повеќе клиентелистичка отколку вредносна“.
На прашањето за евентуален судир помеѓу партиското раководство и пратеничката група, Битиќи истакна дека отворен конфликт нема, но дека постојат моменти на несогласување. „Јас понекогаш знам да бидам гласноговорник на несогласувањата, и тоа е убавината на СДСМ. Но преку разговори секогаш наоѓаме заеднички јазик за да ги претставиме интересите и вредностите на партијата“, рече тој.
Во однос на локалните избори, Битиќи посочи дека резултатите биле очекувани поради ниската излезност. „Ако ваков резултат се повтори на парламентарни избори, тоа е загрижувачки. Ова е моментот за сериозни концепциски промени во партијата, ако сакаме СДСМ да се врати таму каде што ѝ е местото – да владее со државата“, нагласи поранешниот вицепремиер.
Тој истакна дека реформите во партијата се неизбежни и мора да бидат длабоки. „Реформите не се само име и презиме. Тие значат целосно внатрешно реконфигурирање на начинот на кој функционира СДСМ“, додаде Битиќи.
