Во Грција од денеска официјално започна 35-годишната концесија за најдолгиот автопат во земјата – Виа Игнација (Егнација Одос), со што грчката држава веднаш инкасираше околу 1,3 милијарди евра. Концесионерскиот договор предвидува вкупни инвестиции од над 3,4 милијарди евра, од кои 420 милиони евра се наменети за надградба и изградба на современ „затворен“ автопат кон Евзони, односно до границата со Македонија.
Концесијата е доделена на компанијата „NEA EGNATIA ODOS PARACHORISI S.A.“, предводена од GEK TERNA и EGIS PROJECTS, која во следните 35 години ќе управува со Виа Игнација и нејзините три главни вертикални оски. Договорот опфаќа итна исплата од 1,275 милијарди евра кон грчката држава, повеќе од 1,8 милијарди евра за тешко одржување и дополнителни 420 милиони евра за итни надградби и нови инфраструктурни зафати.
Посебно значајно за Македонија е тоа што околу 50 километри од трасата Чаластра – Евзони ќе се трансформираат во модерен автопат со високи безбедносни стандарди. Проектот беше тема на разговор меѓу вицепремиерот и министер за транспорт Александар Николоски и грчкиот министер за инфраструктура и транспорт Христос Димас, за време на неодамнешните средби во Атина.
Во рамки на надградбите, планирана е изградба на 16 нови бензински станици и 12 современи места за одмор, како и значителни интервенции на асфалтот, мостовите, тунелите и безбедносните бариери долж целата траса. Проектот опфаќа над 1.000 километри патишта и има за цел трансформација на постојната инфраструктура во модерна и безбедна мрежа од европска класа.
Грчката влада оценува дека концесијата не претставува само приватизација, туку и силен инвестициски циклус што ќе ја зајакне националната економија, ќе придонесе за намалување на јавниот долг и ќе ја подобри поврзаноста на Северна Грција со соседните земји. Егнација Одос, долга 670 километри, останува клучна сообраќајна артерија што ги поврзува Јонското Море со турската граница и претставува еден од најкомплексните инфраструктурни проекти во грчката историја.
Се очекува модернизацијата на автопатот, особено делницата кон Евзони, да овозможи побрз и поефикасен транспорт на стока и патници, со директно позитивно влијание врз трговијата и транзитната улога на Македонија, како и врз поврзаноста со Солунското пристаниште и европските пазари.
