Американскиот претседател Доналд Трамп најави формирање на „Одбор за мир“ кој ќе ја надгледува обновата и управувањето на Појасот Газа по војната, но Европската Унија засега останува надвор од играта. Според информации на лондонскиот „Тајмс“, во составот на одборот се очекува да се најдат европски лидери како францускиот претседател Емануел Макрон, германскиот канцелар Фридрих Мерц и италијанската премиерка Џорџа Мелони, но нема да има посебно место за ЕУ како блок.
Ова предизвика незадоволство во Брисел, особено откако ЕУ уште од усвојувањето на Резолуцијата 2803 на Советот за безбедност на ОН во ноември 2025 година изрази интерес за учество. Резолуцијата го задолжи „Одборот“ да ја поддржи администрацијата, економското закрепнување и реконструкцијата на Газа.
Еврокомесарката за Медитеранот, Дубравка Шуица, уште тогаш нагласи дека ЕУ како најголем донатор и најблизок сосед на Палестинската автономна управа заслужува место во транзициското тело предложено од Трамп. „Ако зборуваме за фер-плеј, сигурно треба да имаме место во овој одбор“, рече таа еден ден по усвојувањето на резолуцијата.
Според најновите информации, Трамп сè уште не предвидува застапеност на ЕУ во составот, што медиумите во Брисел го оценуваат како нов „непријатен сигнал“. Ова е особено контрастно со фактот дека ЕУ моментално останува најголемиот финансиски поддржувач на Палестинската автономна управа, која би требало да го преземе управувањето со Газа според планот на американскиот претседател.
„Одборот за мир“ ќе го предводи поранешниот бугарски министер за надворешни работи и одбрана, европратеник и поранешен специјален претставник на ОН за Блискоисточниот мировен процес и Ирак, Николај Младенов. Според американскиот портал „Аксиос“, полноправните членови на одборот ќе бидат објавени во текот на оваа недела и се очекува да вклучуваат околу 15 светски лидери, меѓу кои и од Велика Британија, Египет, Катар, Саудиска Арабија и Турција.
