Москва упати остри закани кон Велика Британија откако се појавија извештаи дека украинските сили за првпат користеле британски беспилотни летала во напади врз цели длабоко на руска територија.
Според „Сандеј тајмс“, Украина користела дронови произведени од две британски компании како дел од засилената кампања за напади врз руски цели на голема оддалеченост.
Руската амбасада во Лондон оцени дека информациите покажуваат оти британската влада „намерно избира ескалација“ на конфликтот и ја обвини Британија дека преку Украина се обидува да ѝ нанесе максимална штета на Русија.
„Постапките на Лондон неизбежно ќе имаат последици за кои тој ќе мора да одговара“, порача руската амбасада.
Од Москва дополнително предупредија дека колку подлабоко Велика Британија биде вклучена во конфликтот и колку поголема поддршка ѝ обезбедува на Украина, толку поголема ќе биде „цената“ што ќе ја плати.
Од британското Министерство за одбрана, пак, порачаа дека Обединетото Кралство „стои рамо до рамо со Украина“ и ќе продолжи да ѝ обезбедува опрема потребна за одбрана од руската инвазија.
„Русија не треба да се сомнева во решителноста на оваа влада да се спротивстави на руската агресија – во Украина, но и против Обединетото Кралство и нашите сојузници“, изјави британскиот портпарол.
Во меѓувреме, Украина ги интензивира нападите со дронови со долг дострел врз руска територија. Цел на нападите се воени објекти, индустриски капацитети, енергетска инфраструктура и логистички центри.
Меѓу погодените објекти се најде и голем логистички центар на рускиот онлајн трговец „Wildberries“ во Московската област, каде што избувна голем пожар.
Според податоците на независниот мониторинг центар ACLED, во јули биле регистрирани трипати повеќе украински напади со дронови на руска територија отколку во јануари.
Зголемената употреба на беспилотни летала со долг дострел ја принудува Русија да ја распоредува противвоздушната одбрана на пошироко подрачје.
Руското Министерство за одбрана во саботата соопшти дека руските сили собориле 598 украински беспилотни летала над 19 руски региони, како и над Црното и Азовското Море и Крим.
Најновите обвинувања дополнително ги зголемуваат тензиите меѓу Москва и Лондон, во услови кога британската воена и политичка поддршка за Украина останува еден од клучните фактори во конфликтот.
…
