На покана на премиерот и лидер на ВМРО-ДПМНЕ, Христијан Мицкоски, денеска во Клубот на пратениците ќе се одржи лидерска средба на претседателите на парламентарните партии со пратенички групи во Собранието. Средбата се најавува како обид за отворање поширок политички дијалог за неколку чувствителни и долго одложувани прашања – реформите во правосудството, изборот на народен правобранител, измени на Изборниот законик и иднината на т.н. техничка, односно Пржинска влада.
Иако Мицкоски ја претставува иницијативата како повик за консензус околу „клучните државни прашања“, на стартот е јасно дека лидерската средба ќе се одвива без најголемата опозициска партија. Претседателот на СДСМ, Венко Филипче, јавно го одби повикот, оценувајќи дека укинувањето на техничката влада е обид на власта да си обезбеди алиби за евентуални предвремени избори и да го укине, како што тврди, еден од ретките контролни механизми за фер изборен процес.
Наспроти тоа, учество потврдија лидерите на Левица и ДУИ, Димитар Апасиев и Али Ахмети. Од ДУИ одлуката беше донесена на седница на Генералниот совет во Мала Речица, каде што едногласно беше поддржано Ахмети да седне на маса со другите политички лидери. Партијата засега не ги открива своите конкретни позиции, нагласувајќи дека тоа ќе биде „ексклузивно право“ на лидерот на ДУИ на самата средба.
Левицата, пак, настапува со условена поддршка. Партијата е подготвена да разговара за укинување на техничката влада, но само доколку паралелно се отвори прашањето за воведување една изборна единица. Пратеникот Амар Мециновиќ порача дека нивното присуство е обид конечно да се воспостави суштинска комуникација со парламентарното мнозинство, откако, како што рече, подолг период иницијативите на Левица остануваат игнорирани.
Од владејачката коалиција, на средбата се очекува лидерот на ЗНАМ и градоначалник на Куманово, Максим Димитриевски, како и претставникот на коалицијата ВРЕДИ, градоначалникот на Тетово, Биљал Касами. Според координаторот на пратеничката група на ВРЕДИ, Беким Ќоку, поканата не содржела прецизен дневен ред, но коалицијата прифатила да учествува, особено имајќи го предвид нивниот став дека техничката влада е анахронизам за земја што преговара за членство во Европската унија.
Иако не се дел од средбата во тесна смисла, ЛДП и ДОМ јавно ја поздравија иницијативата. ЛДП порача дека дијалогот не смее да се сведе само на прашањето за техничката влада, туку мора да отвори одговори за теми што директно влијаат врз животот на граѓаните. Од ДОМ, пак, апелираа на агендата да се вклучат и изборни реформи како една изборна единица и отворени листи без изборен праг.
Мицкоски, кој уште на почетокот на јануари најави дека ќе иницира ваква средба пред заминувањето на Светскиот економски форум во Давос, инсистира дека процесот треба да биде инклузивен и базиран на политичка зрелост. Тој порача дека укинувањето на техничката влада не треба да се прави без широк консензус, иако отворено призна дека парламентарното мнозинство има доволно гласови тоа да го направи и без опозицијата.
По одбивањето на СДСМ, премиерот изрази разочараност, оценувајќи дека наместо широчина и одговорност, добил – како што рече – неодговорен пристап. Од друга страна, Филипче останува на ставот дека реформските закони треба да се дебатираат и носат во Собранието, а не на лидерски средби, и дека техничката влада мора да остане како гаранција за фер избори.
