Во Тирана беше потпишан важен Меморандум за соработка меѓу две македонски здруженија од Балканот – македонското друштво „Илинден“-Тирана, предводено од претседателот Никола Ѓурѓај, и здружението ВАРДАР-МКД од Подгорица, Црна Гора, кое го претставува потпретседателот и адвокат Никола Ангеловски. Овој чекор е насочен кон зајакнување и промоција на правата и културната автентичност на македонските национални малцинства во Албанија и Црна Гора, како на домашен, така и на меѓународен план.
Двете организации изразија спремност за воспоставување цврсто партнерство, со акцент на реализирање на заеднички проекти кои ќе го истакнуваат македонското културно и научно наследство. Планот вклучува истражувачки иницијативи, создавање и развој на проекти, како и нивна презентација преку различни културни и спортски манифестации.
Особено внимание ќе се посвети на поддршка на научни истражувања, културно-уметнички активности, спортски настани и хуманитарни акции, со цел градење на видливост и препознатливост на македонската заедница во регионот. Со овој потег, „Илинден“-Тирана и ВАРДАР-МКД ја зацврстуваат својата улога како столбови на македонската култура и идентитет надвор од матичната држава.
