Министерот за надворешни работи и надворешна трговија Тимчо Муцунски денеска оствари работна средба со претставници на Стопанската комора на Северна Македонија, предводени од претседателот Бранко Азески, на која беше разговарано за унапредување на поддршката за домашните извозно ориентирани компании.
На средбата фокусот бил ставен на иницијативи и конкретни форми на поддршка за компаниите кои настапуваат на странските пазари, преку организација на тематски посети со активно вклучување на деловната заедница, подобрување на комуникацијата со дипломатско-конзуларните претставништва и промоција на извозните капацитети на Македонија пред дипломатскиот кор во земјата.
Муцунски и Азески ја потврдиле одличната досегашна соработка меѓу Министерството и Комората, при што изразиле заемно задоволство од досегашните резултати и подготвеност таа дополнително да се продлабочи со конкретни придобивки за компаниите и позитивен ефект врз вкупниот економски развој на државата.
Во рамки на разговорите биле истакнати и мислењата и предлозите на стопанството и на Комората како релевантна институција со долгогодишно искуство, кои ќе послужат како основа за креирање поефикасни политики за поддршка на извозот и зајакнување на надворешно-трговските активности на македонските компании.
