Товарен брод што пловел под иранско знаме потонал во средата во Каспиското Море, додека се враќал од Русија, соопштија властите во Туркменистан. Според првичните информации, постои сомнеж дека бродот превезувал оружје од Иран кон Русија по рута која често се користи за транспорт на воена опрема.
Станува збор за бродот „Рона“, со депласман од 2.453 тони, долг 114 метри и широк 13 метри. Туркменистанското Министерство за надворешни работи информира дека по испратениот СОС-сигнал, спасувачките екипи успеале да ги извлечат сите 14 членови на екипажот, државјани на Иран и Индија.
Податоците од системите за следење покажуваат дека „Рона“ во периодот од октомври 2024 до декември 2025 година околу 20 пати влегувал во руските пристаништа Астрахан, Махачкала и Азов, пловејќи од иранските пристаништа Амирабад и Анзали. И на последното патување, дестинацијата била Астрахан.
Овој инцидент се случува во контекст на зголемени активности поврзани со транспорт на оружје преку Каспиското Море. Минатиот месец, украински специјални единици, заедно со движењето на отпорот „Чорнаја Искра“, спровеле операција во која биле нападнати два руски брода што превезувале оружје и воена опрема. Во август 2025 година, украинските сили ја нападнаа и пристанишната зона Оља во Астраханската област, при што бил погоден брод натоварен со делови за дронови „Шахед“ и муниција од Иран.
Пристаништето Оља се смета за клучен логистички центар за увоз на иранска воена опрема во Русија. Истражувања на меѓународни медиуми уште од 2023 година укажуваа на сомнителни бродски рути, при што бројни бродови под иранско и руско знаме намерно ги исклучувале своите системи за следење додека се движеле меѓу иранските и руските пристаништа.
Според тие извештаи, најголемиот број на „исчезнати“ сигнали биле регистрирани токму во близина на Амирабад, Анзали и по должината на реката Волга и пристаништето Астрахан, кои се користат за транспорт на оружје и муниција за руските сили ангажирани во војната во Украина.
