Руските сили денеска извршија серија воздушни напади врз Киев и други делови од Украина, при што беше погодена и зградата на Националната академија на науките на Украина.
Според информациите што ги објави украинскиот претседател Володимир Зеленски, во нападите има загинати цивили, додека спасувачките екипи се на терен и трагаат по лица кои можеби останале заробени во погодените објекти.
На социјалните мрежи се појавија снимки од зградата на Академијата, на кои се гледаат големи оштетувања, пожар и густ црн чад. Според објавените снимки, дел од луѓето се обидувале да ја напуштат зградата преку прозорците.
Покривот и горните катови на објектот се сериозно оштетени, а околината е прекриена со остатоци од тули, бетон и друг градежен материјал. Пријавени се и оштетувања на возила кои биле паркирани во близина.
„Руски напад ја погоди зградата на Националната академија на науките на Украина. Спасувачките операции се во тек: екипите го гаснат пожарот и бараат луѓе кои можеби се заробени внатре. Сите служби се распоредени“, напиша Зеленски на Икс.
Украинскиот претседател наведе дека Академијата не била единствената погодена локација. Според него, во Киев биле нападнати и фармацевтска компанија и бензински пумпи, додека во Днепар бил погоден деловен центар. Зеленски исто така соопшти дека во други градови и региони биле погодени цивилни објекти, бизниси и комуникациска инфраструктура.
Тој изрази сочувство до семејствата на загинатите и порача дека нападите, според него, треба да бидат сигнал за западните партнери за продолжување на поддршката за Украина.
Спасувачките служби продолжуваат со гаснењето на пожарите и пребарувањето на оштетените објекти, додека се очекуваат дополнителни информации за бројот на жртвите и причинетата материјална штета.
…
