Тензиите на протестот за полагање на правосудниот испит на албански јазик во Скопје ескалираа во физичка пресметка, по што полицијата приведе три лица.
Според информациите, за време на протестот дошло до инцидент меѓу неколку учесници, при што имало шамари, боксови и влечење по облека. На снимките и фотографиите кои се шират на социјалните мрежи може да се забележи како едно лице останува со искината маица по тепачката.
Од полицијата засега нема детални информации за причините за конфликтот, но потврдено е дека три лица биле приведени по нарушувањето на јавниот ред и мир.
Протестот беше организиран поради барањето правосудниот испит да може да се полага и на албански јазик, иницијатива која во последните месеци предизвика силни политички реакции и поделби во јавноста.
На протестите претходно учествуваа студенти и поддржувачи од повеќе албански организации и политички структури, кои тврдат дека станува збор за право загарантирано со Законот за употреба на јазиците. Од друга страна, од Министерство за правда досега остануваат на ставот дека актуелниот закон не дозволува правосудниот испит да се полага на албански јазик.
Прашањето веќе подолг период предизвикува судири меѓу албанските политички блокови, но и остри дебати меѓу власта и опозицијата. Во изминатиот период беа организирани повеќе протести и маршеви низ Скопје, а дел од организаторите претходно биле повикани и на информативни разговори во полиција.
Инцидентот денеска дополнително ја вжешти атмосферата околу ова чувствително прашање, а на социјалните мрежи веќе се споделуваат снимки од тепачката и полициската интервенција.
