На 19 јануари, понеделник, со почеток во 10 часот, пред храмот „Света Недела“ во Битола ќе се одржи една од најзначајните верски традиции – спуштањето на Светиот Крст во водите на базенот пред црквата. Овој обред, кој симболизира чистење на душата и телото, го потсетува верниот народ на крштението на Господ наш Исус Христос во реката Јордан.
Отец Николче Неделковски ќе го изврши осветувањето и спуштањето на Крстот, чин што секоја година собира голем број верници од градот и пошироката заедница. Според најавата од храмот „Света Недела“, ова е настан кој ја зајакнува вербата, ги зближува луѓето и поттикнува заедништво меѓу сите присутни.
Организаторите ги повикуваат сите православни верници да присуствуваат и да го следат свечениот чин, со што ќе го одбележат празникот Богојавление – Водици во духовна радост и традиционален обред.
