Новиот режим на електронска евиденција за влез во земјите од Шенген зоната може да предизвика сериозен економски застој во Македонија и регионот, предупреди вицепремиерот и министер за транспорт Александар Николоски, коментирајќи го најавениот протест на превозниците што започнува од понеделник.
Според него, станува збор за мерки кои директно го погодуваат транспортниот сектор, а индиректно го загрозуваат извозот, странските инвестиции и цели индустриски гранки, меѓу кои и челичната индустрија. Николоски нагласи дека револтот на транспортерите е целосно оправдан, бидејќи новите правила не ја земаат предвид реалноста во која функционираат превозниците од земјите надвор од ЕУ.
„Ова не е проблем само на Македонија, туку на целиот Западен Балкан. Ако овие правила останат, ќе зборуваме за драстично намалување на транспортот, затворање компании и губење работни места“, истакна Николоски од собраниската говорница.
Тој откри дека Владата повеќе од една година води интензивни разговори со Европската комисија, но засега без конкретен резултат. Последната средба ја имал во декември во Брисел со еврокомесарот за транспорт Апостолос Цицикостас и со генералната директорка за мобилност и транспорт Магда Копцинска.
„Им објаснив дека ова во пракса значи економска смрт за регионот. Формално, правилото за престој од 90 дена во период од 180 дена останува исто, но реалноста е сосема поинаква. Превозниците не се туристи. Тие работат, транзитираат и немаат можност да извадат работни визи затоа што немаат работодавач во конкретна земја членка“, нагласи Николоски.
Дополнителна тежина на проблемот, според него, даваат и две други отворени прашања со ЕУ – карго сертификатите и новите квоти за извоз на челик. Николоски оцени дека Западен Балкан не смее да биде третиран како „трета земја“ и ставен во иста категорија со економии како Кина и Индија.
„Ако квотите за извоз на челик се пополнат за два месеца, потоа следи царина од 50 отсто. Тоа практично значи стоп за извозот во ЕУ и колапс на челичната индустрија. Фени веќе се затвори. Со вакви линеарни политики, лесно може да се предвиди што ќе им се случи и на останатите производители“, предупреди тој.
Вицепремиерот додаде дека Владата е во постојан контакт со стопанските комори, транспортните здруженија и странските инвеститори, а Министерството за надворешни работи веќе е задолжено официјално да побара одложување на примената на новите правила.
„Ќе работиме сериозно и координирано за стабилизирање на транспортниот сектор и за заштита на економските интереси на државата и регионот“, порача Николоски.
