Разговарајќи со медиумите, американскиот претседател Доналд Трамп упати нови критики кон сојузниците од НАТО, тврдејќи дека за време на 20-годишниот конфликт во Авганистан, војниците на Алијансата „останале настрана, далеку од вистинската линија на фронтот“.
Трамп изрази сомнеж дека НАТО би реагирал за да ги брани САД во случај на напад, посочувајќи дека иако некои сојузници испратиле војници во Авганистан, нивната улога била ограничена. „Никогаш не ни требаа на вистинскиот фронт“, рече тој, додавајќи дека Соединетите Американски Држави мораат да бидат „многу добри кон Европа и другите земји, но тоа мора да биде двонасочна улица“ изјави Трамп за „Фокс њуз“.
Статистиките покажуваат дека вкупно 3.486 војници на НАТО загинале во Авганистан, од кои 2.461 биле Американци. Велика Британија претрпела 457 загуби, Канада 165, а Италија, Германија, Франција и Данска исто така запишале смртни случаи.
Особено остри зборови Трамп упати кон Данска, нарекувајќи ја „неблагодарна“ за американската заштита за време на Втората светска војна и за сегашното распоредување во Авганистан.
На овие тврдења реагираше генералниот секретар на НАТО, Марк Руте, кој потенцираше дека сојузничките земји секогаш биле подготвени да ги поддржат САД и дека цената платена во Авганистан е висока. „Можете да бидете апсолутно сигурни дека ако САД бидат нападнати, сојузниците ќе застанат покрај вас“, рече Руте, пренесува „Гардијан“.
Трамп, пак, предложи тестирање на НАТО преку клаузулата за заедничка одбрана, сугерирајќи дека САД треба да проверaт како ќе реагираат сојузниците на безбедносни закани, со цел да се оцени нивната вистинска спремност.
