Граничните премини во Македонија денеска и денес се под блокада за товарен сообраќај, откако македонските камионски превозници заедно со колегите од Западен Балкан започнаа седумдневен протест. Причината е воведувањето на електронската евиденција за престој во Шенген-зоната, која од април годинава ќе се применува според правилото 90/180 дена.
Според превозниците, новиот ЕЕС систем ги става во нерамноправна положба во однос на возачите од земјите-членки на Европската унија, кои нема да се соочуваат со исти ограничувања. Тие бараат посебен статус и да не се третираат како туристи при влез во Шенген-зоната, за да може нивниот професионален транспорт да продолжи непречено.
„Нашата цел не е да ја сопреме домашната економија, туку да покажеме што може да се случи ако проблемот не се реши. Кога на блокадата ќе се приклучат и други земји, како Турција, ќе имаме над милион тони стока што ќе остане блокирана. Тоа треба да биде јасен сигнал за сите,“ изјави Билјана Муратовска од асоцијацијата „Макам-транс“.
И покрај блокадата на товарниот сообраќај, патничкиот сообраќај на граничните премини се одвива нормално. Превозниците, сепак, предупредуваат дека долготрајни блокади не се одржливи и дека штетата за домашните производители и граѓани ќе расте, па доколку не се постигне договор, ќе бидат разгледани и други форми на притисок.
Муратовска потсети дека Македонија има потпишано билатерални договори со повеќе земји во регионот, кои овозможуваат слободно движење на товарниот транспорт. Дополнително, според превозниците, нема економска логика за ангажирање по двајца возачи по камион, особено во време на сериозен недостиг од професионални возачи.
