Бугарија бележи значителни економски загуби поради блокадите на граничните премини со Србија и Северна Македонија, изјави бугарскиот вицепремиер во оставка и министер за транспорт и врски, Гроздан Караџов, на Софискиот економски форум.
„Ваквите блокади не само што ги кршат основните права, како правото на слободен премин и транспорт на стоки, туку предизвикуваат сериозни економски последици за транспортниот сектор и сите други индустрии зависни од снабдувањето“, рече Караџов, додавајќи дека економските загуби ќе бидат значајни за сите засегнати земји, не само за Бугарија.
Тој нагласи дека решението не е во еднострани блокади, туку во дијалог со европските институции, кои можат да посредуваат и да помогнат да се најде компромис што ќе ја отвори можноста за слободен премин на стоки додека траат преговорите. Караџов најави дека ќе иницира создавање „прозорци“ на граничните премини за товарниот сообраќај, иако истакна дека тоа тешко ќе се реализира.
Блокадите беа воведени од камионски превозници кои бараат промена на правилото на ЕУ за електронска евиденција за престој во шенген-зоната според правилото 90/180 дена, што во моментот доведе до прекин на товарниот сообраќај на граничните премини кон шенген-зоната.
