Град Скопје го започнува новиот етапен проект за ревитализација на спортската инфраструктура на кејот на Вардар. Синоќа, градоначалникот Орце Ѓорѓиевски заедно со министерот за спорт Борко Ристовски, ја направија првата обиколка на терените, означувајќи го официјалниот старт на реконструкцијата.
Според објавите на социјалните мрежи на градоначалникот, Скопје добива уште еден значаен проект кој ќе ги подобри јавните простори и ќе ја зајакне спортската култура меѓу граѓаните. Во рамките на иницијативата, ќе бидат изградени нови терени за фудбал, одбојка и кошарка, а постојните ќе бидат целосно реконструирани. Дополнително, на кејот ќе се постават модерни фитнес зони на отворено, кои ќе бидат достапни за сите генерации, со цел промовирање на активен и здрав начин на живот.
Но, проектот не застанува само на кејот. Во фокусот се и спортските терени во Маџир Маало, кои ќе бидат целосно обновени и повторно ставени во функција на заедницата. Ова е дел од пошироката визија за рамномерен развој на градот, инвестирање во здравјето на граѓаните и создавање простори каде спортот и рекреацијата се достапни за сите.
