Руската нафтена компанија Лукоил е на чекор од голема трансформација на својата меѓународна мрежа. Компанијата постигна договор за продажба на својата странска единица, Лукоил Интернешнл ГмбХ, на американската инвестициска фирма Карлајл груп. Од компанијата информираат дека ова е резултат на неколку претходни обиди за продажба, поттикнати од санкциите кои САД ги воведе поради конфликтот во Украина.
Засега не се објавени финансиски детали за трансакцијата. Договорот, како што истакнуваат од Лукоил, ја исклучува активата во Казахстан, а целата зделка сè уште бара зелено светло од Министерството за финансии на САД. Компанијата додава дека преговорите со други потенцијални инвеститори продолжуваат.
Реализацијата на продажбата би донела и директни промени во Македонија. Лукоил Македонија, којашто располага со 40 бензински пумпи, 550 вработени и 10 резервоари, ќе добие нов сопственик. Засега, основач и содружник на македонската филијала е токму Лукоил Интернешнл ГмбХ, заедно со компанијата Литаско Са.
