Министерот за земјоделство, шумарство и водостопанство Цветан Трипуновски денеска изврши увид во активностите за ревитализација на езерото „Младост“, кое за првпат по околу 60 години се подложува на темелно чистење.
Според планираните активности, во тек е фаза на механичко отстранување на сувите наслаги и трската од крајбрежниот појас на езерото. Активностите се реализираат во соработка помеѓу АД „Водостопанство“ и ЈПВ „Лисиче“ – Велес, со поддршка од Министерството за земјоделство, шумарство и водостопанство.
За реализација на проектот е обезбедена финансиска поддршка од 6.000.000 денари од Програмата за водостопанство. Целта на ревитализацијата е подобрување на квалитетот на водата и дополнување на акумулацијата со свежа вода, што ќе придонесе за одржливост и подобрување на еколошката состојба на езерото „Младост“.
